Solidariteit sê oor ‘kranksinnige’ NGV

(Argieffoto: JC Gellidon/Unsplash)

Solidariteit sal Vrydag sy kommentaar oor die regering se voorgestelde Nasionale Gesondheidsversekering (NGV) in die Nasionale Raad van Provinsies lewer. Die sperdatum vir kommentaar oor die omstrede gesondheidsversekering is vandag.

Solidariteit se kommentaar oor die NGV – wat die organisasie as “kranksinnig” bestempel – lui dat die plan nie net ondeurdag is nie, maar ook “onbekostigbaar, onuitvoerbaar en onnodig”.

Die organisasie sê voorts die planne word gedryf deur die ANC-regering se ideologie en honger na sentralistiese mag en dat navorsing deur die Solidariteit Navorsingsinstituut (SNI) hierdie siening staaf.

Solidariteit voer aan:

• Die NGV is onbekostigbaar: Volgens navorsing van die SNI gaan die tesourie ʼn bykomende R296 miljard benodig om die NGV ʼn werklikheid te maak. Daarvoor gaan mense aansienlik meer belasting moet betaal – ʼn geraamde 40%-verhoging op persoonlike belasting vir salaristrekkers. Die staatskas is leeg. Daar is nie geld vir die NGV nie.
• Dit NGV is onuitvoerbaar: Die NGV sal waarskynlik beteken dat talle medici wat private gesondheidsorgdienste lewer, die land verlaat. Daar is reeds ʼn tekort aan spesialis-gesondheidsorgwerkers en die aanduidings is dat dié tekort ernstig sal toeneem. Die mislukking van die openbare gesondheidsorgstelsel op kleiner skaal, soos dit tans ondervind word, dui op mislukking op ʼn veel groter skaal sou die NGV aanvaar word.
• Die NGV is onnodig: Suid-Afrikaners het reeds toegang tot gratis gesondheidsorg en die ware behoefte is dat hierdie openbare gesondheidsorgstelsel onderhou en verbeter moet word. Indien die nodige hulpbronne en energie aan die opgradering daarvan, pleks van die oprig van ʼn nuwe stelsel, gewy word, sal die gehalte van openbare gesondheidsorg verbeter. Daarmee saam sal die doeltreffende private gesondheidsorgstelsel ongeskonde bly vir diegene wat verkies om daarvan gebruik te maak.

Connie Mulder, hoof van SNI, sê elk van dié argumente behoort op hulle eie swaar genoeg te weeg om die NGV te laat vaar.

“Tog hou die ANC-regering hom doelbewus blind daarvoor, omdat die werf van stemme by hom swaarder weeg as die lewe van Suid-Afrikaners.

“Anders as hoe dit verkoop word, gaan die NGV nie die lewens van arm Suid-Afrikaners verbeter nie. Inteendeel, dit sal die lewenstandaard van almal in die land negatief raak en veral arm Suid-Afrikaners verder in ellende dompel,” sê Mulder.

Solidariteit het ook gewaarsku dat hy nie gaan toelaat dat gesondheidsorg in “nog ʼn Eskom, SAL of Transnet ontaard” nie en het reeds aangedui hy sal die regering in die hof die stryd aansê indien daar nie van planne om die NGV in te stel, afgesien word nie.