Swaar straf wink vir Swart namate klagte ophoop

Jaco Swart (Foto: Facebook)

ʼn Lang tronkstraf kan die veroordeelde vroueslaner Jaco Swart se voorland wees indien hy weer skuldig bevind word van aanranding. Dit terwyl daar ten minste vier klagte van aanranding én twee van bedrog soos ʼn swaard oor sy kop hang.

Maroela Media is boonop in besit van ʼn video wat wys hoe Swart een van sy werknemers aanrand, maar dié saak is nog nie by die polisie aangemeld nie.

Ontevredenheid heers ook oor die vonnis wat Swart verlede Dinsdag in die streekshof in Pretoria-Noord opgelê is – ʼn boete van R20 000 en drie jaar tronkstraf wat vir vyf jaar opgeskort is – omdat baie mense voel dat dié straf hopeloos te lig is.

Die saak spruit uit ʼn voorval wat op 18 November 2018 op kringtelevisie-beeldmateriaal vasgevang is en wys hoe Swart sy vervreemde vrou, Nicoleen, in die kantoor van sy motorhandelonderneming in Pretoria-Noord, skop, stamp en slaan.

Llewellyn Curlewis, ʼn strafregkenner, sê Swart kan vir etlike jare tronk toe gestuur word indien hy skuldig bevind word op die bykomende aanklagte van aanranding teen hom. Indien hy weer aangekla word, is sy kans om borg te kry boonop uiters skraal.

“ʼn Opgeskorte vonnis beteken dat direkte tronkstraf opgeskort is op sekere voorwaardes – onder meer dat die beskuldigde nie weer skuldig bevind word aan ʼn soortgelyke misdaad nie. Indien hy op die nuwe aanklagte van aanranding skuldig bevind word, kan hy dié keer swaarder gestraf word omdat hy sy opskortvoorwaardes verontagsaam het. Hy word dan ook in die hof se oë nie meer as ʼn eerste oortreder gesien nie. Die staat kan al hierdie aspekte as verswarende omstandighede in die hof aanvoer,” sê Curlewis.

“Streng gesproke sal Swart dan drie jaar direkte tronkstraf kry plus die vonnis wat hy vir die jongste oortredings opgelê is.”

Curlewis wys ook daarop dat Swart se kanse om borgtog te kry skraler sal wees indien hy weer in die hof moet verskyn. “Die hof hou nie daarvan as ’n beskuldigde ʼn geneigdheid tot misdaad toon nie.”

Beeldmateriaal wat Maroela Media onder oë gehad het wys hoe Swart ʼn man in die einste kantoor waar Nicoleen aangerand is, skop en slaan. Die voorval het volgens etlike bronne dieselfde dag as Nicoleen se aanranding plaasgevind. Na wat verneem word, was hierdie man een van Swart se werknemers. Hy het egter nie ʼn aanrandingsklag aanhangig gemaak nie.

Soos vroeër berig is nóg drie klagte van aanranding teen Swart – in onderskeidelik Brackenfell en Bellville – aanhangig gemaak.

’n Vierde klag van aanranding is Vrydag by die Brackenfell-polisiestasie geopen. Dié beweerde aanranding het glo verlede Vrydag – drie dae voor Swart se vonnis – plaasgevind. Die klag hou verband met een van die ander drie aanklagte, wat glo op dieselfde aand plaasgevind het.

Bedrogsake

ʼn Verdere twee klagte van bedrog het ook onder Maroela Media se aandag gekom. Hierdie klagte is by die Sinoville-polisiestasie aanhangig gemaak.

Volgens die klaers moes Swart in 2018 sy motorhandelonderneming toemaak ná bedrogklagte destyds teen hom gebring is. Die bedrog spruit uit onderhandelings wat by sy onderneming gedoen is.

Elize du Plessis en haar man, Francois, het in 2018 ʼn bedrogsaak teen Swart aanhangig gemaak. Die Du Plessis-egpaar het glo ʼn voertuig by Swart teen R185 000 aangekoop, maar die eienaar van die voertuig het glo nooit dié geld gesien nie. Die eienaar het gevolglik ʼn hofbevel gekry, wat toegesien het dat die motor teruggeneem word en die Du Plessis-egpaar was dus hul voertuig én R185 000 kwyt. Die egpaar glo Swart het die geld net so in sy sak gesteek.

Té ligte vonnis

Nicoleen Swart (Foto: Anja van der Merwe, Maroela Media)

Curlewis meen hoewel Swart se vonnis nie ’n baie swaar straf is nie, word dit wel as ’n “normale vonnis binne die distrikshof se jurisdiksie” beskou.

Hy sê die staat kon verswarende faktore voor die hof lê of die saak na die streekshof verwys om ʼn swaarder vonnis te verseker. Hy sê die staat kon ook meer moeite gedoen het om die video as getuienis by die hof in te dien nadat dit ontoelaatbaar bevind is omdat die verdediging die video se egtheid bevraagteken het.

“Op die ou einde kon die landdros net die getuienis wat voor hom geplaas is, in ag neem om ’n uitspraak te lewer. Elke saak word op sy eie meriete hanteer.”

Action SA het die staat ook Dinsdag hieroor gekap en gesê hy kon die verdediging se standpunt oor die video betwis het. Die party voer aan die staatsaanklaer het ook versuim om die klaer en ’n video-deskundige as getuies te roep (wat albei beskikbaar was en bereid was om te getuig ter verswaring van die vonnis).

Op grond van hierdie inligting het Action SA besluit om aan die Direkteur van Openbare Vervolging van Gauteng te skryf om te versoek dat die Nasionale Vervolgingsgesag (NVG) dringend teen die vonnis appelleer.

Die party gaan ook vra dat daar ’n deeglike ondersoek na die aanklaer se optrede gelas word.