‘Te gevaarlik’ om kragonderbrekings in Jhb te herstel

‘n Vragmotor wat Sondag (8 September 2019) op die hoek van Main Reef- en Kerkstraat in Denver aan die brand gesteek is. (Foto: Twittere via @AsktheChiefJMPD)

Weens die vlaag van geweld wat Sondag opnuut in Johannesburg opgevlam het, kan tegniese probleme wat kragonderbrekings in die stad veroorsaak nie herstel word nie. Dit is eenvoudig te gevaarlik vir tegnici om in gebiede van geweld te beweeg.

Isaac Mangena, woordvoerder van City Power, het gesê om veiligheidsredes word al sy spanne operateurs en tegnici uit gevaargebiede onttrek. Dit sluit in gebiede soos die Johannesburgse sakesentrum, asook Jeppestown, Malvern, Rosettenville, Hillbrow en Berea waar aanvalle op die ondernemings en huise van buitelanders voortduur.

“In sekere gebiede, waaronder Alexandra en Lenasia, het City Power die afgelope paar weke weens die aanvalle gesukkel om dienste te lewer, of kon net beperkte dienste lewer. Ons kliënte sal voortgaan om verontrief te word met beperkte of geen reaksie op kragonderbrekings in gebiede waar gevaar voorsien word,” het Mangena gesê.

ʼn Gebou in Malvern wat Sondag (8 September 2019) aan die brand gesteek is. (Foto: Twittere via @AsktheChiefJMPD)

Mangena het gesê City Power-dienste wat nie vereis dat hierdie gebiede regstreeks deur City Power-personeel besoek hoef te word nie, gaan wel normaalweg voort.

“City Power sal vandag weer die situasie assesseer om te bepaal of daar enige verbetering in die veiligheid van hierdie gebiede is, en sal elke oggend saam met ons personeel besluit [of hulle in gewelddadige gebiede ingaan]. Die gewelddadige betogings is vir City Power kommerwekkend en die veiligheid van ons werknemers en kontrakteurs is van sleutelbelang.”

Intussen het die ANC ʼn beroep op wetstoepassers gedoen om ʼn permanente oplossing vir die xenofobiese geweld te vind in die lig van die jongste geweld wat in Johannesburg opgevlam het.

Wetstoepassers wat ontplooi is in die Johannesburgse sakesentrum waar geweld opnuut opgevlam het. (Foto: Twittere via @AsktheChiefJMPD)

Pula Mabe, nasionale woordvoerder van die ANC, het terselfdertyd ʼn beroep op die publiek gedoen om nie eie reg te gebruik nie. “Die ANC het geveg vir vrede en sekuriteit vir almal en ons moet nooit misdadigers of opportuniste toelaat om ons gesamentlike pogings vir vrede en stabiliteit te ondermyn nie,” het Mabe gesê.

Maroela Media het vroeër berig die polisie het Sondag mense gemaan om weg te bly van die Johannesburgse middestad en spesifiek die gebied rondom die MTN-taxistaanplek nadat betogers weer die strate ingevaar en ondernemings begin aanval het. Dit is die jongste voorval in ʼn vlaag van geweld teenoor buitelanders wat op talle plekke oor die hele land opgevlam het.

Mabe het gesê hoewel dit verstaanbaar is dat “wetsgehoorsame burgers siek en sat is vir diegene wat ons kinders in prostitute en dwelmverslaafdes verander”, verwelkom die ANC alle buitelanders wat wettig in die land is en die land se wette gehoorsaam.

“Die ANC veroordeel voorvalle van xenofobie waar ook al dit mag plaasvind.”

ʼn Gebou in Malvern wat Sondag (8 September 2019) aan die brand gesteek is. (Foto: Twittere via @AsktheChiefJMPD)

Humanitêre hulp aan buitelanders

Die Stad Ekurhuleni het in reaksie op die xenofobiese aanvalle twee sentrums op die been gebring waar sowat 800 daklose buitelanders, onder wie 227 kinders, tans gehuisves word. Dié buitelanders is sonder heenkome gelaat weens xenofobiese aanvalle in die Mandela- informele nedersettings en die Nhlapo-gedeelte van Katlehong.

Die Stad Ekurhuleni sê in ʼn verklaring hy het ʼn gesamentlike bedryfsentrum geaktiveer om humanitêre en verwante hulp te bied aan die mense wat geraak word. “Verskeie stadsdepartemente verskaf die nodige ondersteuning, soos afvalverwydering, kragvoorsiening en bykomende ablusiefasiliteite,” lui die verklaring.

Wetstoepassers wat ontplooi is in die Johannesburgse sakesentrum waar geweld opnuut opgevlam het. (Foto: Twittere via @AsktheChiefJMPD)

“Die stad voorsien ook bystandkragopwekkers, metropolisie-patrollies en wetstoepassers om mense waar nodig vir noodsaaklike vervoer te vergesel.”

Kos, mediese dienste, komberse, matrasse, speelgoed vir kinders en sanitêre ware word ook by die twee sentrums aan die hulpbehoewendes verskaf. Verskeie niewinsgewende organisasies, waaronder Dokters Sonder Grense, Rooi Kruis en plaaslike kerke, het hulp aangebied om ontwortelde buitelanders by te staan.

“Planne om buitelanders weer te integreer in die gemeenskappe waar hulle uitgewerp is, is reeds ingestel, asook om die nodige dokumente te bekom vir ongedokumenteerdes.” Die regering sal buitelandse burgers wat verkies om na hul land van herkoms terug te keer, help om dit te doen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Werner

As hulle dit sekuriteid vir almal noem wil ek nie weet hoe lyk dit as hulle die dag se nou het ons nie meer sekuriteid nie

Christa

Hoe Langer die regering talk on die land te regeer Soos hul eersters wou, hoe meer Sal die demone die land verwoes. Hou maar op met kla en vat maar die gemors

Vonkprop

Ek sien nie een foto waar die wetstoepassers werk nie. Almal staan net rond in groepe. Miskien is dit dalk ‘n goeie idee om nie rond te staan nie en pro-aktief op te tree om geweld te voorkom, maar duidelik wag hulle tot iets gebeur en dan sal die groepie opbreek en begin monitor.

Lana

Die ANC doen ‘n beroep op wetstoepassers “om ‘n permanente oplossing vir die xenofobiese geweld te vind”.
Ai, dis darem moeilik om ‘n land reg te regeer, ne ANC?
Nou los die regering die probleem voor die deur van wetstoepassers!!

wiehan

Ek sien die Leiers in die lande waar die emigrante vandaan kom kla so oor die aanvalle in SA en dat ons niks daaraan doen nie. Hoekom sorteer hul nie die gemors in hul lande uit nie, dan het hulle mense nie nodig om na ons land te vlug nie. Vee eers voor jou eie deur voor jy voor iemend anders se deur wil vee.