VL eis terugvoer op memorandum; Cele besoek Horner-gesin

Bheki Cele, minister van polisie, ontmoet Brendin Horner se geliefdes. (Foto: Lirandzu Themba/Twitter)

Vrystaat Landbou (VL) sê die bestendigheid en veiligheid van landelike gemeenskappe is in belang van die hele land en hy sal dus voortgaan om sy lede aan te moedig om stappe te doen om hul eie veiligheid te verseker.

“Vrystaat Landbou veroordeel geweldsmisdaad in die algemeen, ook teen vroue en kinders, maar in besonder geweld teen boere en plaaswerkers.”

Die organisasie het Dinsdag ʼn memorandum aan die LUR’e vir onderskeidelik polisie, paaie en vervoer, asook landbou en landelike ontwikkeling oorhandig waarin hy eis dat deeglike ondersoek ingestel word na bewerings van korrupsie in polisiegeledere. Die bewerings word vervat in ʼn verslag wat reeds aan die Valke in die provinsie oorhandig is.

VL eis ook dat beslissend opgetree word teen groepe en verteenwoordigers van politieke partye wat veral boere as “gronddiewe en uitbuiters” teiken omdat dit geweld aanhits en rassehaat bevorder.

“Ons eis om binne sewe dae terugvoer te kry oor die stappe wat gedoen gaan word en diegene wat aanspreeklikheid gaan aanvaar om te verseker bogenoemde eise kry aandag,” lui die memorandum.

VL sê hy bly verbind tot bestendigheid en vreedsame naasbestaan tussen alle gemeenskappe sodat werksgeleenthede geskep kan word en landelike gemeenskappe kan groei.

In sy memorandum sê VL alle betogings moet ordelik en binne die raamwerk van die wet geskied en dat hy gemeenskappe se grondwetlike reg steun om vreedsaam te rou en te betoog.

“Die staat se nalatigheid met die hantering van landelike misdaad en veral diegene in die polisie wat daarby betrek word, het ʼn leemte geskep wat toegelaat het dat geweldsmisdaad ongebreideld voortduur. Ons erken dat gemeenskaplike erkenning en respek nodig is vir ʼn florerende en vreedsame Suid-Afrika,” lui die memorandum verder.

VL sê hy glo daar is ʼn direkte verband tussen veediefstal en intimidasie op plase, asook brandstigting en selfs moord.

Die organisasie sê die moord op Brendin Horner en die situasie by die Senekal-landdroshof wat daarop gevolg het, het die diepe wonde wat wetteloosheid en misdaad landwyd veroorsaak – maar veral in landelike gebiede – op die voorgrond geplaas.

Horner, ʼn 21-jarige plaasbestuurder, is voorverlede week wreed op ʼn plaas in die omgewing van Paul Roux vermoor. Twee vermeende veediewe, Sekwete Mahlamba en Sekola Matlaletsa, is kort ná die moord aangekeer. Chaos het Dinsdag by die hof uitgebreek waar hulle verskyn het, toe talle mense daarheen opgeruk het om hul misnoeë met die misdaadsituasie – en veral plaasaanvalle en -moorde – te kenne te gee.

Bheki Cele, minister van polisie, het die jong man se familie vandag besoek. Die ontmoeting het agter geslote deure plaasgevind.

Volgens Lirandzu Themba, Cele se woordvoerder, het die Horner-familie tydens die besoek gesê hulle hoop die gebaar beëindig die spanning wat die afgelope ruk in die gebied heers.

Cele het daarna met landbouorganisasies en boere vergader.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

21 Kommentare

jongste oudste gewildste
Sarel

Agter geslote deure is goed. Dit hou die Media en Netwerk24 daar uit.

Trotse Boervrou

Dit is die skynheiligste gebaar wat ek nog ooit gesien het. Ek weerhou my eerder van enige verdere kommentaar. Sterkte aan die Horner gesin.

Michael

Daai kerel sal nooit ‘n voet in my huis sit sonder om in te breek in my afwesigheid nie.

Pieter

Cele is n rassis- en komplot saam eff en anc, passop hulle probeer almal mak maak oor hulle alles gelos het tot nou. Boere en plaaswerkers wees op julle hoede, dit geld vir die normale opregte mens buite ook. (Die regering gee nie om nie en eff nog minder oor hulle mense.)

Werner

Sy besoek beteken niks.Dit is maar net vir die oorsese mense om vir hulle te wys dat hy ook kamstig vir die boere omgee.Maar hy laat toe dat boere onregverdig in tronke gehou word en geviktimiseer word.Dit is om van te walg