Foto’s: Windhoekse gemeenskap takel slaggate

Die gemeenskap van Windhoek het saamgespan om die slaggate in dié stad reg te maak. Van links na regs: Alan Lang en Jason Hammerslag van Talisman wat die toerusting verskaf het, Petterson, vrywilliger en werklose man en ds. Fourie van den Berg. (Foto: Verskaf)

Toe ds. Fourie van den Berg, predikant en kranige drawwer, een oggend voor sonsopkoms in die donker strate van Windhoek in ʼn slaggat trap en die spreekwoordelike stukkie aarde koop, het hy daar en dan besluit om sélf die slaggate in die Namibiese hoofstad te takel.

Daar is na raming 2 000 slaggate, kleintjies én grotes, in Windhoek alleen wat gereeld padongelukke veroorsaak. Van den Berg het die gemeente van die NG-kerk Eros, waar hy predikant is, genader om hom te help om dié enorme taak aan te pak.

Hy sê hy het toestemming by die plaaslike munisipaliteit gekry om die Gatvul-projek van stapel te stuur en het daarna voelers uitgesteek na vrywilligers en borge.

“Ek het altyd die munisipaliteit gekritiseer oor die vervalle toestand van die strate en dat hulle ooglopend niks daaraan doen nie. Ek het daaroor gedink en het besef hulle is dalk oorweldig.”

Sowat 40 lede van die gemeenskap het vandeesweek reeds nagenoeg 300 gate reg gemaak. Die projek duur volgende week voort en ʼn span ingenieurs sal ook vir die volgende agt Vrydae aan die slaggate aandag gee.

Van den Berg vertel selfs die gewilde restaurant Joe’s Beer House het elke dag ʼn groep mense, van kokke tot kelnerinne, gestuur om te kom help. OJ Construction, ʼn konstruksiemaatskappy, het ook twee spanne mense gestuur om ondersteuning aan die projek te verleen.

“My oë het oopgegaan oor watter harde werk dit is om so in die bloedige son te staan en met ʼn pik en ʼn kraghamer die teer te kap,” sê hy. Hy voeg by dat die kwik sommige dae tot 40 °C styg en dat daar van die onlangse swaar reënval nie meer sprake is nie.

Wat vir hom egter die meeste uitgestaan het, is die band wat gesmee is tussen lede van die gemeenskap. “Ek kon voel hoe die gaping wat deur politiek tussen mense gevorm is kleiner word.”

Vrywilligers het vandeesweek saamgespan om die slaggate in Windhoek op te vul. (Foto: Verskaf)

ʼn Kitskosrestaurant voorsien die spanne ook elke middag van hamburgers en koeldranke en die plaaslike Checkers het aangebied om vir elke vrywilliger ʼn kospak met items soos meel, olie, suiker en pasta te skenk. ʼn Gemeentelid het ook aangebied om ná afloop van die projek die vrywilligers te trakteer op braaivleis.

“Dit is ongelooflik om te sien hoe ʼn gemeenskap selfs in swaar ekonomiese tye hulle hande en beursies oopmaak vir ʼn goeie doel. Ek stap weg hier met hoopvolheid in my hart vir Namibië en die wete dat hier mense is wat werklik nog omgee.”

Drie werklose mense, wat oor die radio van die Gatvul-projek gehoor het en as vrywilligers aan die slaggate gewerk het, het intussen as gevolg van die projek vaste werk gekry.

“Drie mense se lewens het verander deur hierdie projek. Hulle het nie kom werk om die tyd te verwyl en nie vir die belonings nie, maar kyk hoe word hulle nou beloon.”

Van den Berg sê die bande van sy vrou se motor loop gereeld deur in die slaggate in die Windhoekse strate. “Ek het toe maar die gate waardeur sy moet ry, eerste laat reg maak,” skerts hy.