Huilende Osaka neem ‘onbepaalde’ breuk van tennis

Naomi Osaka reageer tydens haar wedstryd teen Leylah Fernandez van Kanada. (Foto: Getty Images/AFP)

Terwyl die viermalige Grand Slam-wenner Naomi Osaka die trane afgevee het ná ʼn verstommende nederlaag Vrydag by die Amerikaanse Ope, het sy gesê sy gaan ʼn onbepaalde breuk van tennis neem.

“Ek weet eerlik nie wanneer ek my volgende tenniswedstryd gaan speel nie,” het Osaka gesê terwyl sy oorweldig is deur emosie.

“Ek dink gaan vir ʼn wyle ʼn breuk van tennis neem.”

Daarmee het die verdedigende Amerikaanse Ope-kampioen haar Covid-19-gesigmasker opgesit, opgestaan en die nuuskonferensie beëindig nadat sy 5-7, 7-6 (7/2) en 6-4 teen die Kanadees Leylah Fernandez verloor het.

Osaka, derde op die wêreldranglys, het haar aan die Franse Ope onttrek en nie aan Wimbledon deelgeneem nie weens geestesgesondheidsprobleme wat volgens haar vererger is omdat sy ná wedstryde mediakonferensies moet bywoon.

Sy het ʼn aanbod om Vrydag se sessie te beëindig van die hand gewys voordat sy aangekondig het dat sy ʼn breuk gaan neem.

“Hoe stel ek dit?” het Osaka hardop gevra.

“Dit voel vir my of ek nie gelukkig is as ek wen nie. Dis eerder ʼn verligting. En wanneer ek verloor, is ek hartseer. Ek dink nie dis normaal nie. Ek wou nie regtig nie, maar ek voel …”

Nadat sy gesê het dat sy wil voortgaan met die mediakonferensie, het Osaka gesê: “Dit is moeilik om uit te druk. Ek is op ʼn punt waar ek probeer uitpluis wat ek wil doen.”

Sy het daarna haar voorgenome breuk aangekondig.

Die stap volg nadat sy vroeër op die baan haar raket verskeie kere gekap het.

“Ek is jammer daaroor. Ek is nie regtig seker hoekom nie. Ek het vir myself gesê om kalm te bly, maar miskien het ek gevoel daar is ʼn breekpunt. Gewoonlik voel dit vir my of ek van uitdagings hou. Ek was egter onlangs angstig as dinge nie in my guns verloop nie en dit voel vir my of jy dit kan aanvoel.”

Sy het dit vergelyk met ʼn kind se woedeuitbarsting.

“Ek was ʼn bietjie soos ʼn klein kindjie.”

Op ʼn vraag of dit Fernandez se dien of die spanning van die oomblik was, het Osaka gesê daar is ander kwessies wat sy probeer hanteer wat die ineenstorting veroorsaak het.

“Ek skat ons almal moet sommige dinge verwerk; ek weet ek moet sekere goed hanteer.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

23 Kommentare

jongste oudste gewildste
koos10

Sy is blykbaar nie meer mal oor tennis nie!

Niklaas

Gaan ek haar vreeslik mis? Neewat, nie eintlik nie. Sy was net té uitgesproke deesdae, en dan is daar haar emosionele kwessies ook.

MakersMark

Die spanning……

Dries

Eina.Ek nog altyd jammer gevoel as ek verloor.Nou wat nou?

Malan

Haar probleem het begin toe sy politiek en sport begin meng het. Politiek is iets waarvan sy niks weet nie. Los dit en jy sal weer goeie tennis speel.