Opgestel deur die Podlitiek-span
Met die hutsteken #SouthAfricaShutDown wat die rondte op sosiale media doen, het Podlitiek dit goed gedink om nie, soos ons moederland, hals oor kop by nog ’n week se bespreking van nuus en gebeure in te boender nie. Hierdie week is Paul Maritz en Hermann Pretorius aan die woord met ’n vars insig op die jongste plaaslike en internasionale opspraakwekkendhede.
Die gesegde lui dat waar ’n rokie trek, is ’n vuurtjie… nou ja, in Pretoria en Johannesburg trek daar tans ’n hele magdom rokies. Podlitiek bespreek die tragiek van ’n inmekaartuimelende openbare mening oor veiligheid, met veral persone van ander lande wat in die afgelope weke se xenofobiese geweld geteiken is. Volgens berigte is daar reeds ten minste vyf mense oorlede, en die vraag op almal se lippe is (in die woorde van dr. Theuns Eloff se boek): Wat nou, Suid-Afrika?
Tweedens kom die voorgestelde ekonomiese reformasie van die minister van finansies, Tito Mboweni, aan die woord. Paul daarop dat hierdie dokument, wat so skelm ingeglip is en vir ’n rukkie onder die radar gebly het, nie noodwendig enige nuwe inligting met die leser meedeel nie – dit is eerder die ANC se interne reaksie op die dokument wat interessant is. Die vraag oor ideologie en beleidsrigting bestaan onder die ANC in hierdie stadium, met party wat die sosialistiese droom blindelings sal deurtrek, en ander wat besef dat die realiteit oorweeg moet word. Luister gerus na hierdie interessante insetsel.
Laastens kyk die twee paneellede na wat presies in Brittanje aan die gang is. Hierdie eens stabiele politieke stelsel het onlangs grootskaalse bedankings uit sy heersersparty, die Konserwatiewe Party, gesien, en Boris Johnson se Brexit-plan het die hele land skynbaar in rep en roer.
Wat jy ook al doen, moenie vergeet om Podlitiek weekliks te luister nie.
Die feit dat alles so op ‘n kritieke tydstip verkeed loop vir CR moet tog iewers iemand laat wonder of daar nie ‘n hand in die paai is nie. Hoe toevallig is toevallig. Al die misdaad pla nie niemand in die regering nie totdat dit nuttig word. Die volk was nog altyd ‘n lekker tranetrekker-hulpmiddel wanneer dit nodig word. Kyk hoe Trump gepeper is sedert hy verkies is. Feitlik die hele wèreld is nou teen hom.