Leeus krepeer op Vrystaatplaas

Argieffoto van ‘n leeu in aanhouding. (Foto: Via Big Cat Conservation)

ʼn Inspeksie van ʼn leeuplaas in die Vrystaat het kommerwekkende resultate gelewer nadat inspekteurs op 13 leeukarkasse afgekom het wat in ʼn vrieskas ingeboender is. Die oorblywende leeus is in haglike omstandighede aangetref.

Die Nasionale Dierebeskermingsvereniging (NDBV) en die Vrystaatse departement van ekonomiese sake, kleinsake-ontwikkeling, toerisme en omgewingsake (Destea) het vroeër vandeesmaand by die plaas aangeklop en op die karkasse afgekom.

“Die vrieskas was in ʼn onhigiëniese toestand met bloed en verrotte vleis op die vloer rondom dit. Die leeus se oorskot is ook saam met die oorblywende leeus se voedselvoorraad geberg,” lui die NDBV se verklaring.

Volgens inspekteurs by die NDBV het hulle redelike rede om te glo dat dié leeus nie aan natuurlike oorsake omgekom het nie.

Die NDBV het beslag gelê op sewe van die 13 karkasse en volledige nadoodse ondersoeke van stapel gestuur. Die resultate van dié ondersoek sal binnekort bekend gemaak word.

Onder die tientalle leeus op die plaas het vier leeus verskillende fisieke of ander gesondheidstoestande onder lede wat nie behandel is nie. Daar is vasgestel dat verskeie leeus ook met parasiete besmet is.

Altesaam 10 leeus het glad nie toegang tot drinkwater nie, terwyl 17 leeus slegs onhigiëniese drinkwater tot hul beskikking het.

Die leeus se skuilings het ʼn opeenhoping van vars en verkalkte ontlasting gehad, asook ontbinde voedsel en beendere. Dié skuilings is klaarblyklik selde skoongemaak.

“Weens die oorbevolkingsprobleem het van die leeus nie toegang tot ʼn voldoende skuiling wat hulle teen die weersomstandighede kan beskut nie.

“Die Afrikaleeu is een van die mees geliefde en ikoniese diersoorte ter wêreld. Die werklikheid is egter dat die meeste van dié diere in gevangenskap gehou en uitgebuit word vir kommersiële doeleindes.”

Talle oortredings ingevolge die Wet op Dierebeskerming is tydens die inspeksie opgemerk en die NDBV se ondersoek duur nog voort.

“Ons samel tans voldoende bewyse in om te verseker dat die oorblywende leeus beter behandeling geniet.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

36 Kommentare

jongste oudste gewildste
Helene

Maar weereens n bewys die totale verval van hierdie land!

Misky

Dit is mos geheel en al ontoelaatbaar!!!!! Daai mense se name moet bekend gemaak word, onmiddelik inhegtenis geneem word, die leeus ordentlik versorg en mediese behandeling ontvang. Watse bewyse nou eers insamel en asof dit hulle nou beter behandeling gaan gee. Nonsens man!!!!

Johann

Siek! Los die eienaar(s) in die hokke…

Toy

Vat die leeus dadelik weg, en gaan vir hulle ‘n beter lewe in die Kruger wildtuin, dit is ‘n absolute skande en sonde wat aan die diere gedoen word. Dit is dieremishandeling in ‘n erge graad. Geen skoon water en geen kos. Sonde!

Pietertjie

Sies