MTN onttrek oor Steve by AIG-konserte

Steve Hofmeyr voer “Juliet” op by die Afrikaans is Groot-konsert in Kaapstad (Foto: Afrikaans is Groot/Facebook)

Die selfoonnetwerkreus MTN het aangekondig dat hy alle bande met die Afrikaans is Groot-handelsmerk gesny het, ná versoeke op sosiale media omdat die sanger Steve Hofmeyr by die konserte optree.

“Ons het besluit om alle bande met die AIG-geleentheid te sny. Deur ons handelsmerk en netwerk wil MTN Suid-Afrikaners aan mekaar verbind en mense saambring. Ons kan nie enige geleentheid borg wat op enige manier ons missie teenstaan nie,” het die maatskappy op sy amptelike Twitter-blad gesê.

Die maatskappy het in ʼn verklaring bygevoeg MTN “ondersteun die groei en ontwikkeling van Afrikaans en Afrikaans is Groot is ʼn wonderlike platform om dít te bereik”. “AIG se voortgesette verbintenis met Steve Hofmeyr help MTN nie om sy doelwitte na te jaag nie.”

Panyaza Lesufi, LUR vir onderwys in Gauteng, het MTN op sosiale media versoek om sy borgskap vir AIG op te skort. “Liewe MTN, jul borgskap van hierdie persoon [Steve Hofmeyr] is ʼn belediging vir vredeliewende Suid-Afrikaners. As hy by die Afrikaans is Groot-konserte optree, moet julle jul borgskap onttrek. Ons is nie gekant teen AIG nie, maar teen die beledigings van die sogenaamde sanger!”

Lesufi het reageer op ʼn Twitter-plasing van Hofmeyr in Oktober 2014 waartydens hy gesê het: “Jammer om aanstoot te gee, maar in my boeke is swart mense die argitekte van apartheid. Go figure.”

MTN het intussen gesê hy glo daarin om Suid-Afrika se musikale talent ten toon te stel en musiek te bevorder wat meer Suid-Afrikaners blootstel aan die verskillende genres in ons diverse land.

“Die AIG-musiekkonserte het ʼn omvattende lys van welbekende en ontwikkelende Afrikaanse musikante en bied ʼn wêreldklas produksie wat die ʼn uitstekende platform maak om ons Afrikaanssprekende gebruikers te beloon en uit te brei. Plaaslike Suid-Afrikaanse musiek is vol talent, maar dit is moeilik om tot die musiekbedryf toe te tree en enige platform wat toegang tot musiekliefhebbers bied, moet aangemoedig word en verkieslik nie ondermyn word deur die rassistiese uitlating van een kunstenaar nie.”

Die direksie van Afrikaans is Groot het intussen in ʼn verklaring gesê hy vermoed die hele debakel is ’n strategie wat moontlik verband hou met die komende verkiesingsveldtogte van sekere groepe.

“Nog geen borg, insluitende MTN, het Afrikaans is Groot amptelik in kennis gestel dat hulle as borge onttrek nie,” aldus die verklaring.

“Afrikaans is Groot bly ’n musiek- en vermaaklikheidsplatform wat kunstenaars die geleentheid bied om hul talent ten toon te stel. Ons enigste doel is om musiek en vermaak vir die Afrikaanse gemeenskap aan te bied – iets wat alle kulture tog verdien. Hierdie platform is primêr geskep vir die getroue ondersteuners van Afrikaanse musiek, die publiek.”

AIG het bygevoeg die platform verskaf ook inklusiewe werksgeleenthede vir kunstenaars, musikante, tegnici en ongeveer 300 personeel van alle rassegroepe en demografieë.

“Vir ons, wat elke aand sien hoe konsertgangers hulself uitleef en die vertonings geniet met vermaak wat hul harte raak, sal dit baie hartseer wees as hierdie groep onrusstokers die toekoms van hierdie gevestigde en geliefde platform in die wiele ry,” sê Arnold Coleske, uitvoerende vervaardiger van die Afrikaans is Groot-konserte.

“Afrikaans is Groot se posisie bly dus tot verdere kennisgewing onveranderd. Ons sien uit na die res van die vertonings in die Kaap sowel as die komende konserte in Pretoria waarvoor daar reeds nagenoeg 100 000 kaartjies verkoop is. Baie dankie aan ons geliefde ondersteuners, vennote en getroue borge wat die vlagskip van Afrikaanse musiek op die water hou. Ons beloof om niemand ooit teleur te stel of in die steek te laat nie.”

Die Afrikaans is Groot-konserte vind hierdie naweek in Kaapstad plaas.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

131 Kommentare

jongste oudste gewildste
Koos Marais

Maar Lesufi sal altyd ‘n opportunis bly, sing saam in die koor so voor die verkiesing, dalk is dit hy wat die vure so van nuuts af probeer stook. Ek sal glad nie verbaas wees nie.

B

Is dit waar dat MTN & MultiChoice ‘n tafel by die EFF banket geborg het @ R1m?

Johan

Dit gaan kwansuis oor Steve Hofmeyr.
In werklikheid gaan dit oor Afrikaans as taal.
Bewys my asseblief verkeerd…..

Ma

Ag tog. Weereens net jaloesie op iets wat suksesvol is. Hulle sal ook alles probeer om dit wat mooi en goed af te breek tot daar net mooi niks oor is ni. Los maar vir Steve en gee vir Malema beltyd en data sodat hy kan om verskoning vra vir al sy uitlatings. Steve is talentvol en di beste afrikaanse manlike sanger

Mossie

Ag werklik! En BLF en EFF kan baie erger dinge kwyt raak. Steve is of het nie eers n party nie, hy is n persoon op sy eie. Darem maar ironies hoe bang die spul is vir die invloed wat een “so called” sanger moontlik kan hê!
MTN, pasop, boikot Afrikaans en haar sangers en jy boikot jouself!