Tulbagh- moordverdagte was uit op parool

Reagan Gertse (Foto: Twitter)

Chaos het Dinsdag uitgebreek toe ʼn verdagte in die plaaslike landdroshof verskyn het in verband met die moord op ʼn 8-jarige seun van Tulbagh in die Wes-Kaap.

Maroela Media het vroeër berig Reagan Gertse se liggaam is Sondag tussen die bosse naby ʼn rivieroewer in die dorp gevind. Die seun is na bewering verkrag voordat hy om die lewe gebring is.

Gemeenskapslede het opgeruk toe Jakobus Petoors (58) vanoggend in die landdroshof verskyn het in verband met die moord op Gertse. Petoors is familie van die oorledene se pa. Die Nasionale Vervolgingsgesag het aan Maroela Media bevestig dat hy nou ook van verkragting aangekla word.

Eric Ntabazalila, woordvoerder van die Wes-Kaapse Vervolgingsgesag, het aan Maroela Media gesê die saak is vanoggend in absentia uitgestel nadat Reagan se pa en ander gemeenskapslede die verdagte in die beskuldigdebank wou takel. Volgens Ntabazalila het die staatsaanklaer aansoek gedoen om die saak uit te stel aangesien die situasie binne die hofsaal te plofbaar was om met die saak voort te gaan.

Ntabazalila sê polisielede moes Petoors twee keer terug na die aanhoudingselle neem en Reagan se ouers moes die hof verlaat voor die verrigtinge begin het omdat hulle nie hul woede in bedwang kon hou nie.

Ontstoke gemeenskapslede het ook buite die hof betoog en daarop aangedring dat die polisie Petoors aan hulle oorhandig. Gemeenskapslede het hulle ook teen die polisie vasgeloop toe hulle weier dat Petoors die hof verlaat en rubberkoeëls en skokgranate is gebruik om gemeenskapslede te verjaag.

Petoors het ten tyde van die moord by Reagan se pa se ouers, enkele huise van Reagan se ouerhuis in ʼn informele nedersetting, gewoon. Hy het daar gewoon sedert hy in November verlede jaar op parool vrygelaat is. Dit is nie in die stadium duidelik vir watter oortreding Petoors tronkstraf uitgedien het nie. Sy parool is nou opgeskort en hy sal eers op 23 Julie 2024 vrygelaat word vir die vorige oortreding aangesien hy sy paroolvoorwaardes verbreek het. Volgens die landdros, Pieter Klazen, sal enige aansoek om borgtog ook waarskynlik misluk aangesien Petoors nie sy paroolvoorwaardes nagekom het nie.

Volgens Ntabazalila sal Petoors op 2 Junie weer in die hof verskyn. Hy word van die moord, ontvoering en verkragting van Reagan aangekla.

“Dit was die derde hofverskyning in ses werksdae van ’n beskuldigde wat aangekla word van die moord op ’n kind in die Wes-Kaap,” sê Ntabazalila. Die beweerde moordenaar van die 8-jarige Tazné van Wyk, wie se liggaam twee weke gelede gevind is, was óók uit op parool.

Bronne: eNCA, eNuus, IOl, ANA