Vroeë Kersfees wag dalk by brandstofpomp

Foto bloot ter illustrasie. (Foto: Jason Mitrione/Unsplash)

Kersfees kom dalk vroeër vir Suid-Afrikaners en die prys van brandstof kan in November na verwagting ʼn welkome daling ondervind.

Gegrond op ongeouditeerde data van die Sentrale Energiefonds (SEF) verwag die Automobiel-Assosiasie (AA) dat die prys van petrol met sowat R2 per liter kan daal, en die prys van diesel met R1 per liter. Alle aanduidings is dat paraffien ook 98c per liter goedkoper gaan wees.

“Ná drie maande van aansienlike stygings sal die prys van petrol en diesel na verwagting weer onder die R25 per liter-kerf wees,” sê die AA.

In Julie het 95 oktaan-petrol motoriste R22,46 per liter vir gekos. Sou die verwagte daling realiseer, sal brandstof in November in die binneland R23,68 kos vir dieselfde grade petrol.

“Dit is goeie nuus vir motoriste, verbruikers en die ekonomie, veral aan die einde van die jaar.”

Die AA se data wys daarop dat beduidende dalings in die prys van internasionale produkpryse in Oktober die grootste bydraer tot die verwagte dalings is.

“Hoewel die rand verswak het, is die uitwerking daarvan relatief gering in die konteks van die groter prentjie.”

Die AA raai motoriste nogtans aan om hul voertuie in ʼn goeie meganiese toestand te hou en hul bande volgens die vervaardiger se spesifikasies te pomp om “optimale brandstofverbruik te verseker ondanks die verwagte daling in brandstofpryse”.

“Hoewel ons verwag dat brandstof in November goedkoper sal wees, bly ons bekommerd oor die hoë prys van goedere wat ʼn impak op alle verbruikers het,” sê die AA.

“ʼn Volhoubare oplossing om stygende brandstofkoste te versag is steeds nodig en totdat daardie oplossing gevind word, sal burgers aan die genade van brandstofprysstygings oorgelewer wees.”