Oekraïne: ‘ANC praat nie namens SA’ners’

John Steenhuisen in Oekraïne. (Foto: DA/Facebook)

John Steenhuisen, leier van die DA, sê een van die hoofredes waarom hy ʼn besoek aan Oekraïne afgelê het, is om Suid-Afrikaners wat teen die voortslepende konflik is, te verteenwoordig, aangesien niemand anders dit doen nie.

Volgens Steenhuisen was Oekraïense owerhede onder die indruk dat Suid-Afrika nie sy lot in hierdie oorlog ondersteun nie, maar homself eerder by Rusland skaar.

“Die ANC-regering praat beslis nie namens alle Suid-Afrikaners oor die stand van sake in Oekraïne nie, en dit was ʼn groot deel van my boodskap aan die mense wat ek daar ontmoet het.”

Steenhuisen het verlede week dele van Oekraïne besoek in die hoop om eerstehandse inligting oor die verwikkelinge daar in te win, en Suid-Afrika se siening oor die gebeure te verduidelik.

Suid-Afrika, saam met tientalle ander Afrika-lande, het tot dusver geweier om sy stem in te dien in twee hoëprofiel‑teregwysings van Rusland by die Verenigde Nasies (VN), maar het onderneem om ʼn bemiddelende rol in die oorlog te speel.

“Die mense met wie ek gepraat het, kan nie begryp hoe Suid-Afrika hierdie standpunt inneem nie, veral gegewe ons land se eie geskiedenis en ons stryd om vryheid en demokrasie.”

Steenhuisen sê hy het Oekraïense owerhede verseker dat die Suid-Afrikaanse regering se optrede tydens die VN se stemproses en sy “skaamtelose bywoning van Russiese geleenthede wat hul weermag verheerlik het op die dag wat die inval begin het” nie die meeste Suid-Afrikaners se sentiment weerspieël nie.

Talle Suid-Afrikaners en Suid-Afrikaanse organisasies het die afgelope maande sterk standpunt teen Russiese optrede ingeneem.

Die DA hoop nou dat die regering sal besluit om onder meer ʼn beroep op Rusland se president, Wladimir Poetin, te doen om sy leër uit Oekraïne te onttrek, die hawe van Odessa en ander Oekraïense hawens te heropen, gesteelde Oekraïense graan en landboutoerusting terug te besorg en self te erken dat Rusland en Poetin skuldig is aan oorlogsmisdade.

“Die standpunt wat ons regering ingeneem het – om dit te vermy om enigiets te sê of te doen wat Rusland aanstoot kan gee – is immoreel.”

‘Meer moet gedoen word’

Volgens Steenhuisen moet daar meer gedoen word as om bloot te onderneem om ʼn bemiddelende rol tussen die twee lande te speel en het hy pres. Cyril Ramaphosa uitgedaag om homself te vergewis van wat in Oekraïne aangaan.

“Ons eie parlement moet ʼn afvaardiging na Kiëf stuur om met Oekraïense leiers te vergader en self die situasie te beoordeel. Sodra hulle hierdie feite ingewin het, moet hulle terugkom en help om die openbare mening oor die oorlog te verander.

“As die president saam met my na Oekraïne gereis het, gesien het wat ek gesien het, en met die mense gepraat het met wie ek gepraat het, sou hy ook alles moontlik wou doen om die oorlog te beëindig en sy posisie gebruik om druk op Rusland te plaas sodat hulle weet dat hy hul oorlogsmisdade veroordeel,” het Steenhuisen gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

51 Kommentare

jongste oudste gewildste
De Villiers

En julle praat nog minder namens my!

wim

Om te wys dat almal van ons nie Putin ondersteun nie, is een van die DA se beter inisiatiewe, en ek ondersteun dit. Nou, wat van die ander inisiatiewe om die regering hof toe te vat oor die voortslepende onnodige ongrindwetlike Covid beperkings? Moet asb nie daarvan vergeet nie. Ek kry die gevoel dat die nuus van die 5de golf (wat blyk min werklike effek het in terme van bekamping van sterftes) beteken kiesers se entoesiasme om regering teen te staan het getaan. Maar oor ‘n paar weke is hierdie ook agter ons en dan wonder ons hoe dit gekom… Lees meer »

Toy

ANC is selfgesentreerde party gee om net vir hulle self, maar daar gaan nog ‘n dag kom wat al die onregverdigheid gaan stop, niks hou aan vir altyd nie.

CA

Ek hoop Mnr Steenhuisen het ook met sommige van die neo-Nazi’s gepraat wat jare lank al daar deur die Weste bewapen, befonds en opgelei word. Dan sal hy ook maar met die Russe – wat 26 miljoen mense afgestaan het in die oorlewingstryd teen die Nazi’s – moet gaan praat voor hy ‘n omvattende prentjie kan vorm van waaroor dit alles gaan.

VaalDonkie

Niemand het my gevra wat my mening is voor hulle namens my loop praat het nie.