Ramaphosa bel Poetin oor Oekraïne-konflik

Suid-Afrika se pres. Cyril Ramaphosa en Russiese pres. Wladimir Poetin tydens ‘n beraad in 2019. (Argieffoto: Sergei Chirkov/AFP)

Pres. Cyril Ramaphosa het Donderdagaand die president van Rusland, Wladimir Poetin, gebel om oor die huidige konflik tussen dié land en Oekraïne te gesels.

Ramaphosa het op Twitter aangekondig dat hy pas die foon neergesit het na ʼn gesprek met Poetin.

Dié gesprek was glo sodat Ramaphosa ʼn beter begrip van die situasie tussen Rusland en Oekraïne kon kry.

“Ek het ons standpunt oor die konflik wat ontvou uiteengesit, asook ons oortuiging dat die konflik opgelos moet word deur middel van bemiddeling en onderhandeling tussen die partye – en indien nodig – met behulp van ander agentskappe,” het Ramaphosa gesê.

“President Poetin het ons gebalanseerde benadering [oor die konflik] waardeer.”

Ramaphosa het vroeër reeds gesê dat Suid-Afrika ferm aan die kant van vrede staan, aangesien die wêreld bloot nie nog ʼn oorlog kan bekostig nie.

“Op grond van ons betrekkinge met die Russiese Federasie en as een van die Brics-lande, is Suid-Afrika genader om ʼn bemiddelingsrol te speel.”

Die Kremlin het intussen ook ʼn verklaring uitgereik oor die gesprek wat Poetin en Ramaphosa gehad het.

Volgens Rusland het die twee leiers eerstens mekaar gelukgewens met die 30ste herdenking van diplomatieke betrekkinge tussen Rusland en Suid-Afrika.

Ramaphosa en Poetin het verder hul verbintenis tot die ontwikkeling van die bilaterale strategiese vennootskap bevestig, en veral kennis geneem van hul gereedheid om handel, ekonomiese en humanitêre samewerking uit te brei, sowel as gesamentlike Covid-19-reaksiepogings.

“Die presidente het die belangrikheid van voortgesette interaksie binne die Brics-raamwerk en ander internasionale aangeleenthede beklemtoon,” lui die Kremlin se verklaring.

Luidens die verklaring het Poetin ook, op versoek van Ramaphosa, gepraat oor die “redes en doelwitte van die spesiale militêre operasie om die Donbas-streek te beskerm”.

Poetin het Ramaphosa ook ingelig oor die situasie rakende gesprekke met verteenwoordigers van die Oekraïense owerhede.

“Die president van Suid-Afrika het die voortgesette politieke en diplomatieke pogings ondersteun.”

Volgens die Kremlin het Poetin en Ramaphosa ingestem om hul kontak met mekaar voort te sit.

Die Suid-Afrikaanse regering is vroeër van draadsittery beskuldig deur nie kant in die konflik tussen Rusland en Oekraïne te kies nie.

Dit kom nadat Suid-Afrika nie tydens ʼn algemene vergadering van die Verenigde Nasies oor die resolusie waarin Rusland veroordeel is vir sy inval van Oekraïne en daar geëis is dat hy sy magte onttrek, gestem het nie.

Ramaphosa het egter later hierdie besluit verdedig en aangevoer dat die oorlog tussen die twee lande deur middel van bemiddeling beëindig moet word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

72 Kommentare

jongste oudste gewildste
Jack

So nou weet ons waar CR staan.Die weste weet dit ook.

Roebs

Sort jou land uit. En bly uit ander se lande se dinges uit.

Deon

En oor n paar dae word sanksies teen ons ook in gestel…. Is daar enige rede waarom ons as SA enigsins moet kant kies?

Vernon

In kort beteken dit ANC keur die oorlog goed. Ruggraatlose spul.

henndrik

Hierdie besluit van “ons president” gaan nog vir ons baie probleme bring